თითქმის ყველა სტარტაპი კონცეფციით იწყება – იდეით, თუ რა პროდუქტი ან მომსახურება გინდა შესთავაზო მომხმარებელს. წარმატებულ სტარტაპს წარუმატებლისაგან ის გამოარჩევს, თუ რამდენად გონივრულია მისი საწყისი ნაბიჯები.
ამ სტატიაში წარმოგიდგენთ სამ ნაბიჯს, რომელიც აუცილებლად უნდა გადადგათ, თქვენი სტარტაპის საწყის ეტაპზე.

1. ბაზრის შესწავლა

სანამ პროდუქტის წარმოებას და განვითარებას დაიწყებთ, ბაზარი უნდა შეისწავლოთ.
მკაფიოდ ჩამოაყალიბეთ, რა ინფორმაცია გჭირდებათ. მაგალითად:

არსებობს თუ არა მოთხოვნა თქვენს იდეაზე?
რა პრობლემებს აწყდებიან პოტენციური მომხმარებლები, რომელთა მოგვარებაც თქვენს პროდუქტს შეუძლია?
ვინ არიან თქვენი ძირითადი კონკურენტები?
რა განასხვავებთ ერთმანეთისგან?
რა აუთვისებელი სივრცეები რჩება მათ პროდუქტს?

შეაგროვეთ ინფორმაცია თქვენი პოტენციური მომხმარებლებისგან:

ესაუბრეთ თქვენს პოტენციურ მომხმარებლებს. დასვით ღია კითხვები მათ პრობლემებზე, საჭიროებებზე და იმაზე, თუ როგორ ცდილობენ ისინი ამჟამად პრობლემების გადაჭრას. მოუსმინეთ ყურადღებით და ეცადეთ გაიგოთ მათი მოტივაცია.

შეისწავლეთ მათი ქცევა:

დააკვირდით, როგორ იქცევიან ადამიანები თქვენს სამიზნე სეგმენტში. რა პრობლემები ექმნებათ ყოველდღიურ ცხოვრებაში და იფიქრეთ, როგორ უნდა გადაჭრას ეს პრობლემები თქვენმა პროდუქტმა.

2. მინიმალურად სიცოცხლისუნარიანი პროდუქტის (MVP) შექმნა

მინიმალურად სიცოცხლისუნარიანი პროდუქტი ეს არის თქვენი პროდუქტის უმარტივესი ვერსია, რომელსაც აქვს მხოლოდ ის ძირითადი მახასიათებლები, რომლებიც აუცილებელია მომხმარებლის მთავარი პრობლემის გადასაჭრელად. MVP უკვე ფუნქციური და გამოსაყენებელი პროდუქტია, რომელსაც რეალურ მომხმარებლებს შესთავაზებთ.

MVP-ის მიზანია, პროდუქტი ბაზარზე რაც შეიძლება სწრაფად გაუშვათ, მიიღოთ რეალური მომხმარებლებისგან უკუკავშირი და შეამოწმოთ ბიზნეს მოდელი მინიმალური რისკებითა და დანახარჯებით.

MVP-ის შექმნის მიზნებია:

ვალიდაცია: შეამოწმოთ პროდუქტის იდეა და ბიზნეს მოდელი რეალურ ბაზარზე მინიმალური რისკებით.
უკუკავშირი: მიიღოთ ნამდვილი მომხმარებლებისგან ღირებული უკუკავშირი.
სწავლა: გაიგოთ, რა მუშაობს და რა – არა და ამ ინფორმაციაზე დაყრდნობით დახვეწოთ თქვენი პროდუქტი.
დროისა და რესურსების დაზოგვა: თავიდან აიცილოთ ზედმეტი ხარჯები და სრულყოფილი, მაგრამ არავისთვის საჭირო პროდუქტის შექმნა.

3. მონაცემების შეგროვება და ანალიზი

მინიმალური სიცოცხლისუნარიანი პროდუქტის შექმნისა და გაშვების შემდეგ, მუდმივი დახვეწისა და გადამოწმების პერიოდი იწყება. ეს არის განმეორებადი პროცესი, სადაც აგროვებთ მონაცემებს, აუმჯობესებთ პროდუქტს და აფართოებთ მას.

შეისწავლეთ მომხმარებლის ქცევა: გამოიყენეთ ანალიტიკური ინსტრუმენტები (მაგალითად, Google Analytics, Mixpanel, Hotjar). დააკვირდით, თუ როგორ ურთიერთობენ მომხმარებლები თქვენს პროდუქტთან.

რა ფუნქციებს იყენებენ ყველაზე ხშირად?
სად აწყდებიან სირთულეებს ან ტოვებენ პროდუქტს?
რამდენ ხანს ატარებენ პროდუქტთან?
როგორია მათი კონვერსიის მაჩვენებელი (მაგ. რეგისტრაცია, ყიდვა)?

შეაგროვეთ ხარისხობრივი უკუკავშირი:

ინტერვიუები: ჩაატარეთ ინტერვიუები მომხმარებლებთან, რათა გაიგოთ მათი მოტივაცია, საჭიროებები და პროდუქტთან დაკავშირებული შთაბეჭდილებები.
გამოკითხვები: გაუგზავნეთ მოკლე გამოკითხვები პროდუქტშივე ან ელექტრონული ფოსტით.
მომხმარებელთა მხარდაჭერა: დააკვირდით ხშირად დასმულ კითხვებს და პრობლემებს, რომლებსაც მომხმარებლები აფიქსირებენ.

შეჯამება

თუ ამ ნაბიჯებს თანმიმდევრულად და გონივრულად გადადგამთ, თქვენ არა მხოლოდ შეამცირებთ რისკებსა და ხარჯებს, არამედ შექმნით პროდუქტს, რომელიც მომხმარებლის საჭიროებაზეა მორგებული.

ეს მხოლოდ დასაწყისია, მაგრამ, როგორც ამბობენ, კარგი დასაწყისი საქმის ნახევარია.