"სტუდენტი რომ ვიყო, პირველ რიგში ხელოვნურ ინტელექტს შევისწავლიდი," - განაცხადა Nvidia-ს აღმასრულებელმა დირექტორმა, ჯენსენ ჰუანგმა. ეს კარგი რჩევაა სტუდენტებისთვის და ცხადია - სტარტაპერებისთვისაც.

ვერავინ იწინასწარმეტყველებს, როგორ განვითარდება ხელოვნური ინტელექტი, თუმცა თითქმის ყველა ექსპერტი თანხმდება, რომ ეს ტექნოლოგია მალე ჩვენი სამუშაოს განუყოფელ ნაწილად იქცევა. ასე რომ, სჯობს ჰუანგის რჩევას მიჰყვეთ და წინასწარ დაიწყოთ ექსპერიმენტები იმაზე, თუ როგორ გამოიყენებთ ინტელექტუალურ სისტემებს თქვენი ბიზნესის სასარგებლოდ.

ხელოვნურ ინტელექტთან მუშაობის უმთავრესი პირობა არის იმის სწავლა, როგორ ვესაუბროთ მას - როგორ მივცეთ სწორი დავალებები (პრომპტები) სასურველი შედეგის მისაღწევად.

როგორ მივცეთ ხელოვნურ ინტელექტს სწორი დავალება

თუ ეძებთ ძირითად პრინციპებს ეფექტური დავალებების შესაქმნელად, აუცილებლად უნდა გაითვალისწინოთ ფორმულა, რომელიც ინტელექტუალური სისტემების ინჟინერმა ბენ ჰილაკმა შეიმუშავა. ეს ფორმულა ხელოვნური ინტელექტისთვის მისაცემ დავალებას ოთხ ნაწილად ყოფს.

მოდით, ნაბიჯ-ნაბიჯ განვიხილოთ თითოეული ნაწილი:

1. მკაფიოდ ჩამოაყალიბებული მიზანი

ხშირად გვეჩვენება, რომ ჩვენი მოთხოვნები ისედაც გასაგებია და ხელოვნურ ინტელექტს ზედმეტად მოკლე და ზოგად დავალებას ვაძლევთ. თუმცა, ეფექტური კომუნიკაციისთვის, აუცილებელია მოთხოვნის მკაფიოდ და დეტალურად ჩამოყალიბება. ასე მნიშვნელოვნად გავაუმჯობესებთ საბოლოო შედეგს.

ვთქვათ, დამწყები სტარტაპერი ხართ და საინვესტიციო ფონდებს ეძებთ. თქვენი მოთხოვნის ფორმულირება მრავალნაირად შეიძლება. განვიხილოთ ორი მაგალითი:

"ჩამომითვალე საინვესტიციო ფონდები სტარტაპებისთვის".

ასეთი ფორმულირება ზედმეტად ზოგადია, არ შეიცავს კონკრეტულ პარამეტრებს და შესაბამისად, ხელოვნური ინტელექტის პასუხიც არასრულყოფილი და ნაკლებად სასარგებლო იქნება.

აი ამავე მოთხოვნის კარგი ვარიანტი:

"მჭირდება საქართველოში ტექნოლოგიურ სტარტაპებისთვის ხელმისაწვდომი საინვესტიციო ფონდების სია, რომლებიც ორიენტირებულნი არიან ადრეულ ეტაპზე მყოფ კომპანიებზე და აქვთ 100,000 ლარიდან 1 მილიონ ლარამდე ინვესტიციის გაცემის შესაძლებლობა".

ეს ფორმულირება კონკრეტულია, შეიცავს ყველა საჭირო პარამეტრს და ხელოვნურ ინტელექტს საშუალებას აძლევს, მოგაწოდოთ ზუსტად ის ინფორმაცია, რაც გჭირდებათ.

2. სასურველი ფორმატი

რა სახით გინდათ პასუხის მიღება: უბრალო ჩამონათვალის, სტრუქტურირებული ცხრილის თუ სონეტის? იყავით კონკრეტული, რადგან ხელოვნურ ინტელექტს შეუძლია პასუხი თითქმის უსასრულო ფორმატით წარმოგიდგინოთ.

ჩვენს მაგალითში, ეს ნაბიჯი შეიძლება იყოს:

"თითოეული ფონდისთვის, გთხოვ მომაწოდო შემდეგი ინფორმაცია: ფონდის სახელი, ვებ-გვერდის ბმული, საკონტაქტო ელფოსტა, ინვესტიციის მინიმალური და მაქსიმალური ოდენობა, ინდუსტრიული პროფილი, და რამდენიმე წინადადება იმის შესახებ, რა არის მათი უნიკალური უპირატესობა და რატომ შეიძლება იყოს საინტერესო ქართული ტექნოლოგიური სტარტაპისთვის."

3. გაფრთხილებები და შეზღუდვები

ხელოვნური ინტელექტი მუდმივად უმჯობესდება, მაგრამ მას ჯერ კიდევ შეუძლია არაზუსტი ინფორმაციის გაცემა. აუცილებლად მიუთითეთ, რომ ზუსტ ფაქტებს ეძებთ. ასევე გამოყავით ნებისმიერი სხვა შეზღუდვა, რომელიც გსურთ რომ ხელოვნურმა ინტელექტმა გაითვალისწინოს.

ჩვენს შემთხვევაში გაფრთხილებები და შეზღუდვები შემდეგნაირად შეიძლება ჩამოაყალიბოთ: "გთხოვ, მხოლოდ ისეთი ფონდები მომაწოდო, რომლებიც ამჟამად აქტიურად მოქმედებენ საქართველოში. არ არის საჭირო იმ ფონდების ჩამოთვლა, რომლებიც მხოლოდ გვიანი ეტაპის სტარტაპებში აბანდებენ."

4. მაგალითები (სურვილისამებრ)

მაგალითების მიწოდება ხელოვნურ ინტელექტს ეხმარება უკეთ გაიგოს, რას ელით მისგან. მაგალითები განსაკუთრებით სასარგებლოა რთული ან სპეციფიკური ფორმატის მქონე ამოცანებისთვის. თქვენს მიერ მოწოდებული მაგალითი ხელოვნურ ინტელექტს ეხმარება სწორად გაიგოს თქვენი მოლოდინები და სასურველი ფორმით მოგაწოდოთ პასუხი.

ჩვენს შემთხვევაში შეგიძლიათ მიუთითოთ: "აი, როგორ უნდა გამოიყურებოდეს თითოეული ჩანაწერი:
- სახელი: [ფონდის სახელი]
- ვებგვერდი: [მისამართი]
- საკონტაქტო ინფორმაცია: [ელფოსტა/ტელეფონი]
- ინვესტიციის დიაპაზონი: [მინ-მაქს ლარში]
- ფოკუსი: [ინდუსტრიები]
- უნიკალური უპირატესობა: [მოკლე აღწერა]"

ხელოვნური ინტელექტისთვის ინსტრუქციების მიცემის ამ ოთხნაწილიან სტრუქტურაზე დაკვირვებისას, ორი საკვანძო რამ შეიძლება შევნიშნოთ.

პირველი - სიცხადეს არსებითი მნიშვნელობა აქვს. იგივე დავალება თქვენი კოლეგისთვის რომ მიგეცათ, ნაკლები ახსნა-განმარტება დაგჭირდებოდათ, რადგან მან კარგად იცის თქვენი ბიზნესის მიზნებისა და საჭიროებების შესახებ. ხელოვნურ ინტელექტს კი ყველაფერი თავად უნდა აუხსნათ. რაც უფრო დეტალურ ინფორმაციას მიაწვდით, მით უკეთეს პასუხს მიიღებთ.

მეორე - ხელოვნურ ინტელექტთან საუბარი ძალიან ჰგავს ჩვეულებრივ ადამიანურ კომუნიკაციას. ჰილაკის რჩევის დედა აზრია, რომ არ არის საჭირო რაიმე განსაკუთრებული პროგრამული ენის ცოდნა ამ ინსტრუმენტების გამოსაყენებლად. ეს კიდევ ერთი მიზეზია, ხელოვნურ ინტელექტთან ექსპერიმენტების დასაწყებად. ხელოვნური ინტელექტისგან საუკეთესო შედეგების მისაღებად გარკვეული გამოცდილებაა საჭირო, მაგრამ მისთვის კარგი ინსტრუქციების მიცემა არც ისეთი რთულია, როგორც ბევრს ჰგონია.

რაც უფრო ადრე დაიწყებთ ამ უნარების განვითარებას, მით უკეთ მოემზადებით მომავლისთვის.