სტარტაპების სამყარო საკმაოდ კონკურენტულია, თუმცა ეს აუცილებელიცაა, ვინაიდან ბიზნესის ზრდისა და გრძელვადიანი წარმატების წყაროს სწორედ კონკურენცია წარმოადგენს.

მსოფლიოს მასშტაბით ამჟამად ასობით მილიონი სტარტაპი ფუნქციონირებს. ამასთან, ყოველწლიურად ბაზარზე კიდევ მილიონობით ახალი წამოწყება ხორციელდება. ასეთი მაღალი კონკურენციის პირობებში სტარტაპებისთვის წარმატების მიღწევა საკმაოდ რთულია. სტარტაპის წამოწყება კი ბევრად მეტია, ვიდრე მხოლოდ ვებგვერდის შექმნა და ბიზნესის ორგანიზება.

დღეს შემოგთავაზებთ რამდენიმე მარტივ რჩევას, რომელიც დაგეხმარებათ, რომ ამ მძაფრი კონკურენციის პირობებში თქვენი სტარტაპი გამორჩეულად წარმოაჩინოთ.

კონკურენტები სიღრმისეულად შეისწავლეთ

„თუ იცნობ მტერს და იცნობ საკუთარ თავს, არ უნდა გაშინებდეს თუნდაც ასი ბრძოლის შედეგი” — სუნ ძი, „ომის ხელოვნება“.

საკუთარ ბიზნესთან ერთად, კონკურენტების ძლიერი და სუსტი მხარეების, ასევე მათი სტრატეგიების შესწავლა საშუალებას მოგცემთ, კონკურენტულ გარემოსთან უკეთ ადაპტირდეთ და წარმატებისკენ მიმავალი ახალი გზები აღმოაჩინოთ.

კონკურენტების სიღრმისეულად შესწავლა საბოლოო გამარჯვების მოპოვებაში დაგეხმარებათ. თუმცა გაითვალისწინეთ, რომ ამაში უბრალოდ მათი პროდუქტების ან სერვისების შესახებ ინფორმაციის დაგროვება არ იგულისხმება — ის, რასაც დრო უნდა დაუთმოთ, უფრო მრავლისმომცველი ანალიზია. თავად გამოცადეთ მათი შეთავაზებები. რაც უფრო საფუძვლიანად გაერკვევით კონკურენტების საქმიანობაში, მით უკეთ აღიჭურვებით იმ ტერიტორიების აღმოსაჩენად და შემდეგ დასაუფლებლად, რომლებიც მათ აუთვისებელი დარჩათ.

ყოველთვის ობიექტურად შეაფასეთ კონკურენციის მნიშვნელობა

„არ არსებობს იმაზე დიდი საფრთხე, ვიდრე მოწინააღმდეგის არასათანადოდ შეფასება“ — ლაო-ძი.

სტარტაპ სამყაროში სიამაყე შეიძლება წარუმატებლობისკენ გადადგმული პირველი ნაბიჯი იყოს. დიდი შეცდომაა იმის დაჯერება, რომ თქვენი სტარტაპი ბაზარზე ყველაზე კაშკაშა ვარსკვლავია.

იმედგაცრუებამდე მიგიყვანთ იმის დაშვება, რომ თქვენი ბიზნესის შესახებ ყველა მყისიერად შეიტყობს და ფინანსების მოზიდვასაც უმცირეს ხანში შეძლებთ. ხილვადობისა და აღიარების მოპოვებას დრო და ძალისხმევა სჭირდება, ამიტომ აუცილებელია, გაგაჩნდეთ მყარი მარკეტინგული სტრატეგია, რომელიც სამიზნე აუდიტორიასთან კავშირის დამყარებასა და უნიკალურობის მოპოვებაში დაგეხმარებათ.

განაგრძეთ სწავლა, ინოვაციების დანერგვა და, საჭიროების შემთხვევაში, სწრაფად ადაპტირდით. აღიარეთ, რომ ბაზარზე შეიძლება არსებობდნენ კონკურენტები, რომლებიც გარკვეულ სამუშაოს თქვენზე უკეთ ან უფრო ორიგინალურად ასრულებენ. სიამაყე და კონკურენტების უგულებელყოფა წარმატების მიღწევაში ნამდვილად ვერ დაგეხმარებათ.

განსხვავებული ასპექტით წარმოაჩინეთ საკუთარი ბიზნესი

ამ პუნქტში მნიშვნელოვანია ხშირად შეუმჩნეველი „ლურჯი ოკეანის სტრატეგია“ — ნაცვლად იმისა, რომ ეცადოთ, იყოთ უკეთესი, იქნებ განსხვავებულობა სცადოთ?

ისედაც გადატვირთულ ბაზარზე საკუთარი ადგილის დასაკავებლად ბრძოლის ნაცვლად, გამოიკვლიეთ უცნობი ტერიტორიები. „ლურჯი ოკეანის სტრატეგიის“ შემთხვევაში, ეს გულისხმობს ახალი ბაზრების შექმნას ან უკვე არსებულების ახალი პერსპექტივიდან დანახვას.

„იყავი იქ, სადაც შენი მტერი არ არის“ — სუნ ძი, „ომის ხელოვნება“.

დაფიქრდით, შესაძლებელია თქვენი კონკურენტების პროდუქტების გაუმჯობესება? ან არსებობს პოტენციურ მომხმარებელთა სეგმენტი, რომლებზეც ისინი არ ფოკუსირდებიან? ეს არის თქვენი შესაძლებლობა, ბაზარზე რევოლუცია მოახდინოთ. იყავით გამორჩეული, გადადგით მოულოდნელი ნაბიჯი.

ბაზრის არსებული ჩარჩოს ფარგლებში კონკურენციის ნაცვლად, მისი საზღვრების დარღვევაზე ორიენტირდით. უკვე ჩამოყალიბებულ ბაზარზე ახალი ნიშური „სივრცის“ შექმნით შეგიძლიათ, საკუთარი ბიზნესი კონკურენტებისგან გამორჩეულად წარმოაჩინოთ.

ბრენდს ადამიანური თვისებები შესძინეთ

ხელოვნური ინტელექტის ეპოქაში ბრენდის მიერ ადამიანურობის წარმოჩენა შეიძლება მომხმარებლებისთვის განსაკუთრებით მიმზიდველი იყოს.

რას იტყვით მომხმარებლების თქვენს სამყაროში შემოყვანაზე? ბრენდის გამჭვირვალობამ შეიძლება, მათ თავი თქვენი ისტორიის ნაწილად აგრძნობინოს — ეს კი ბევრად მეტია, ვიდრე უბრალოდ პროდუქტის ან სერვისის მოხმარება.

ამიტომაც, აუდიტორიასთან თანმიმდევრული და ავთენტური კავშირი შეინარჩუნეთ. ყურადღება მიაქციეთ მათ საჭიროებებს და მაქსიმალურად სწრაფად ამოიცანით მათი პრობლემები. შექმენით საზოგადოება, რომელშიც თქვენი მომხმარებლები თავს დაფასებულად იგრძნობენ.

რას უნდა მოერიდოთ უნიკალურობის მოპოვების მცდელობაში?

კონკურენტებისგან გამორჩევის მიზნით, შესაძლოა, ფასების შემცირება გადაწყვიტოთ. ეს სარისკო სტრატეგიაა, რომელიც შეიძლება მომხმარებლების მოსაზიდად მარტივ გზად გეჩვენებოდეთ.

პროდუქციაზე ან მომსახურებაზე ფასების შემცირებამ შეიძლება, პარადოქსულად, თქვენი ბრენდი ნაკლებად მიმზიდველი გახადოს. ამის მიზეზი ის არის, რომ, შესაძლოა, მომხმარებლებმა თქვენი ფასეულობის შეთავაზებაში (value proposition) ეჭვი შეიტანონ.

უფრო მეტიც, დაბალმა ფასებმა შეიძლება სხვა მხრივაც ცუდ მდგომარეობაში ჩაგაყენოთ — მწირ მოგების მარჟაზე მუშაობა. ნებისმიერ ბიზნესს, რომელიც მიზნად ისახავს გრძელვადიან წარმატებას, უნდა შეეძლოს ინოვაციების დანერგვა და განვითარება ფინანსური ზეწოლის გარეშე.

ამ პროცესში შეიძლება იგრძნოთ, თითქოს ქაოსში გიწევთ მუშაობა, თუმცა გახსოვდეთ სუნ ძის კიდევ ერთი მოსაზრება: „იქ, სადაც ქაოსია, არის შესაძლებლობაც".

განაგრძეთ შესწავლა, კონკურენტების გამოკვლევა, საზღვრების დარღვევა და, რაც მთავარია, გაბედეთ, იყოთ განსხვავებული.

თუმცა გაითვალისწინეთ — ზოგიერთი ბიზნესი ასევე ვერ აღწევს წარმატებას იმ მიზეზით, რომ დამფუძნებლები ერთდროულად ზედმეტად ბევრ გამოწვევას იღებენ საკუთარ თავზე. საბოლოოდ ისინი ყველაფერს ერთად ვერ უმკლავდებიან, ეს ფაქტი კი ბევრს დანებებისკენ უბიძგებს.

იყო განსხვავებული, ასევე ნიშნავს პრიორიტეტების განსაზღვრას და ყველაზე მნიშვნელოვან საკითხებზე ფოკუსირებას.

თუ ამას მოახერხებთ, წარმატებისკენ მნიშვნელოვან ნაბიჯს გადადგამთ.