სტარტაპ იდეები გამოუცნობი რამაა. დედამიწის ზურგზე ზუსტად არავინ იცის, რომელი იდეა გაამართლებს და რომელი – ჩავარდება. თუმცა, ინვესტორები და აქსელერაციის სპეციალისტები, ადამიანები, რომლებიც უშუალოდ აკვირდებიან უამრავი სტარტაპის განვითარებას, გვარწმუნებენ, რომ გარკვეული კანონზომიერება მაინც არსებობს. კერძოდ: იდეების ზოგიერთი ტიპი და მათი მოფიქრების ესა თუ ის მეთოდი სხვებზე უფრო წარმატებულია.

გამოცდილი მეწარმის, ინვესტორის და Y Combinator-ის პარტნიორის, ჯარედ ფრიდმანის (Jared Friedman) გამოცდილებაზე დაყრდნობით, წარმოგიდგენთ სტარტაპ იდეების გენერირების ხუთ საუკეთესო მეთოდს, რომელთა გამოყენებაც წარმატების მეტ შანსს იძლევა.

1. ენდეთ საკუთარ გამოცდილებას

ეს არის საუკეთესო და ყველაზე ეფექტური მეთოდი, რომელსაც YC-ის ყველაზე წარმატებული კომპანიების დაახლოებით ნახევარი უკავშირდება.

მთავარია, ჯერ განსაზღვროთ რაში ხართ თქვენ ან თქვენი გუნდი განსაკუთრებით კარგი და მოიფიქროთ იდეები, რომელთა აღსრულებაშიც მეტი გამოცდილება გექნებათ კონკურენტებთან შედარებით.

როგორ განვახორციელოთ:

გაიხსენეთ თქვენი სამუშაო გამოცდილება: რა ისწავლეთ წინა სამსახურებში, რაც სხვებისგან გამოგარჩევთ?

მაგალითად: SnapDocs-ის დამფუძნებელი 10 წელი მუშაობდა იპოთეკურ სფეროში და ამ ცოდნით შექმნა პროგრამული უზრუნველყოფა, რომელიც იპოთეკისთვის საჭირო საბუთების ავტომატიზაციას ახდენს.

რა იყო ყველაზე გაუმართავი თქვენს წინა სამსახურში?

მაგალითად: სამსახურში, რომელშიც სტარტაპ Lattice-ის დამფუძნებლები მუშაობდნენ, მათი შრომის ეფექტურობა (Performance Review) უსამართლოდ კრიტერიუმებით ფასდებოდა. ამ უსამართლობით განაწყენებულმა თანამშრომლებმა სამსახური მიატოვეს და შექმნეს ადამიანური რესურსის მენეჯმენტის პროგრამა, რომელიც ობიექტურად აფასებს თანამშრომლების მიერ გაწეულ შრომას.

რა იყო ყველაზე ეფექტური თქვენს წინა სამსახურში?

მაგალითად: Mixpanel-ის დამფუძნებელმა გააცნობიერა, რომ ის ანალიტიკური ინსტრუმენტები, რომელსაც მის ყოფილ სამსახურში იყენებდნენ სხვა კომპანიებსაც გამოადგებოდათ და მისი გაუმჯობესებული ვერსიის წარმოება დაიწყო.

2. შექმენით ის, რაც თავად გჭირდებათ

იფიქრეთ ისეთ პროდუქტზე ან მომსახურებაზე, რომლის მომხმარებელი თავად იქნებოდით. ეს მეთოდი წარმატების კარგი საწინდარია. როცა საკუთარი თავისთვის ქმნით პროდუქტს, შეგიძლიათ ენდოთ საკუთარ ინტუიციას და თანაც, თქვენს კომპანიას ყოველთვის ეყოლება სულ ცოტა ერთი მომხმარებელი – თქვენ თვითონ.

მაგალითად: DoorDash-ის დამფუძნებლები ცდილობდნენ გარეუბანში ტაილანდური საკვების შეკვეთას და აღმოაჩინეს, რომ ასეთი სერვისი არ არსებობდა. შედეგად მათ თავად შექმნეს ეს სერვისი.

3. გააუმჯობესეთ წარმატებული იდეები

იპოვეთ კომპანიები, რომლებმაც ბოლო დროს მიაღწიეს წარმატებას და მოძებნეთ მათი ახლებური ვარიანტები.

მაგალითი: ამ მეთოდის კარგი მაგალითია Standard Cognition. Amazon-მა ცოტა ხნის წინ შექმნა Amazon Go – სასურსათო მაღაზია, რომლის ტურნიკეტიც ავტომატურად გამოითვლის თაროებიდან აღებული ნივთების ღირებულებას, რის გამოც სალაროსთან მისვლა აღარ გჭირდებათ. Standard Cognition-მა გააცნობიერა, რომ იგივე ტექნოლოგია სხვა პროფილის სავაჭრო ობიექტებსაც დასჭირდებოდათ და სწორედ ამას აკეთებს.

4. თვალი ადევნეთ სიახლეებს

ეძიეთ ცვლილებები, რომლებმაც შექმნეს ახალი შესაძლებლობა. ახალი ტექნოლოგიები, დეველოპერული პლატფორმები, რეგულაციები ან ახალი პრობლემა სამყაროში – ეს ყველაფერი ახალი იდეის „ტალღაა“, რომლის ენერგიაც სათქვენოდ შეგიძლიათ გამოიყენოთ.

მაგალითი: ამ მეთოდის კარგი მაგალითია PlanGrid-ი – კომპანია, რომელმაც არქიტექტურული ნახაზები ტაბლეტებში გადაიტანა. მათი პროდუქტის არსებობა iPad-ის გამოგონების შედეგად გახდა შესაძლებელი.

5. მისდიეთ თქვენს გატაცებას

იფიქრეთ იმაზე, რაც ნამდვილად გაინტერესებთ და გაღელვებთ. ეს მიდგომა ენთუზიაზმს გაძლევთ, რაც ხანგრძლივი და რთული სტარტაპის გზაზე აუცილებელია.

მაგალითი: ამის შესანიშნავი მაგალითია კომპანია Boom, რომელიც ზებგერით თვითმფრინავებს ქმნის. Boom-ის დამფუძნებელს არ უმუშავია საავიაციო-კოსმოსურ სფეროში და არც თვითმფრინავების მშენებლობის ექსპერტი ყოფილა, მაგრამ ის უბრალოდ შეპყრობილი იყო ზებგერითი მოგზაურობის იდეით.

და ბოლოს

სტარტაპის იდეები დროთა განმავლობაში იცვლება და ყალიბდება (Airbnb-ის საწყისი იდეა გასაბერი ლეიბების გაქირავების სერვისი იყო).

სულაც არ არის საჭირო ბრწყინვალე იდეას ელოდოთ – დაიწყეთ თუნდაც "ისე რა" იდეით და მიეცით მას ზრდის საშუალება.