კლასიკური ეკონომიკა იმეორებდა ერთსა და იმავე მანტრას: “მიწოდება ქმნის მოთხოვნას.” მაგრამ დღეს, როცა ჩვენი ცხოვრება ათასგვარი პროდუქტითა და მომსახურებით არის სავსე, ამ ფრაზამ თავისი მნიშვნელობა დაკარგა. სანამ ახალი თაობის მეწარმეები მიწოდებას დაიწყებენ, ჯერ მომხმარებლის მოთხოვნა უნდა იპოვონ. ძველი სიბრძნე თავდაყირა დადგა: ახლა უკვე მოთხოვნა ქმნის მიწოდებას.

მაგრამ რაზეა დამოკიდებული მოთხოვნა?

,მნიშვნელოვან პრობლემაზე რომელიც გადაწყვეტას საჭიროებს.

ჩამოთვალეთ თანამედროვე ბიზნესები, რომლებმაც გლობალური მასშტაბის წარმატებას მიაღწიეს. აღმოაჩენთ, რომ თითოეული მათგანი ცდილობს გადაჭრას რაღაც ძირეული და მნიშვნელოვანი პრობლემა. გასაკვირი არაა, რომ Waze-ის დამფუძნებელი, ური ლევინი, გვირჩევს: "შეიყვარეთ პრობლემა და არა გადაწყვეტა."

Harvard Business Review-ს მიერ ჩატარებული კვლევის თანახმად, აღმასრულებელთა 85% მიიჩნევს, რომ მათი ორგანიზაციები მოიკოჭლებენ პრობლემის ამოცნობისა და შეფასების საკითხში. გამოკითხულთა უმეტესობის აზრით, ამის გამო ორგანიზაცია ფუჭად ხარჯავს დროს და ფინანსებს და ხელიდან უშვებს შესაძლებლობებს.

ნებისმიერი პრობლემა, ეხება ის საზოგადოებას, გარემოს, ტექნოლოგიებს თუ ბიზნესს, ახლებურ და ეფექტურ გადაჭრას საჭიროებს.

მაგალითისთვის, გავიხსენოთ WhatsApp-ის ისტორია. მისი დამფუძნებლების მთავარი მიზანი იყო გადაეჭრათ მნიშვნელოვანი პრობლემა: საერთაშორისო კომუნიკაციის მაღალი ფასი. WhatsApp-ი არ იყო ერთადერთი მოთამაშე ამ მოედანზე, მისი კონკურენტები იყვნენ: Viber-ი, Google Allo, KiK-ი, Skype და თვით FB messenger-ი.

WhatsApp-ის გუნდმა შეამჩნია, რომ მობილური ოპერატორები და სხვა აპლიკაციები არაეფექტურად ჭრიდნენ ამ პრობლემას. კონკურენტები, მაგალითად Viber-ი და Skype, დამატებით გადასახადებს აწესებდნენ საერთაშორისო ზარებზე, ხოლო მობილური ოპერატორები ცეცხლის ფასს ადებდნენ საერთაშორისო მოკლე ტექსტურ შეტყობინებებს.

WhatsApp-მა მთელი თავისი ყურადღება დაუთმო ამ პრობლემას და შექმნა უფასო ზარებისა და მოკლე ტექსტური შეტყობინებების ფუნქცია. ამ ყველაფრის სანაცვლოდ, ერთჯერადად უნდა გადაგეხადათ სულ რაღაც 99 ცენტი.

ამ სვლამ გაამართლა და WhatsApp-ს თვეში საშუალოდ 100 მილიონი ახალი მომხმარებელი ემატებოდა. შედეგი? Meta-მ 19 მილიარდ დოლარად შეიძინა კომპანია, რომელსაც მხოლოდ 32 თანამშრომელი ჰყავდა.

რა შეიძლება ვისწავლოთ WhatsApp-ისგან? პრობლემა, რომელიც მრავალ მომხმარებელს აწუხებს, გზის მანიშნებელ ვარსკვლავად უნდა იქცეს სტარტაპებისთვის. არსებობდა მოთხოვნა უფრო სწრაფ და იაფ საერთაშორისო კომუნიკაციაზე და WhatsApp-მა შექმნა შესაბამისი მიწოდება ამ მოთხოვნისთვის. გუნდის მთელი ძალისხმევა მიმართული იყო ერთი მიზნისკენ: საერთაშორისო კომუნიკაცია უფრო სწრაფი და ხელმისწავდომი გამხდარიყო.

მომხმარებლის პრობლემა თქვენი სტარტაპის ათვლის წერტილად უნდა იქცეს: მომხმარებლის პრობლემა → სტარტაპის მიზანი → პროდუქტი.

მომხმარებელთა პრობლემები არ იცვლება; იცვლება მხოლოდ ტექნოლოგია და მომხმარებელთა ქცევა.

WhatsApp-ი არ ყოფილა პირველი აპლიკაცია, რომელმაც კომუნიკაცია უფრო ხელმისაწვდომი გახადა, და Amazon-ი არ ყოფილა პირველი ელექტრონული კომერციის კომპანია. თუ პრობლემა მნიშვნელოვანია, ვიღაც უკვე ცდილობს მის მოგვარებას. ასე რომ, ნუ იჩქარებთ გადაწყვეტის ძიებას.

გადაწყვეტაზე კონკურენცია არაფრისმომცემი ბრძოლაა კომპანიებს შორის: ის ჯერ ფუნქციების ომში გადადის, შემდეგ - ფასების, და საბოლოოდ ყველა ღირებულება ნადგურდება. სწორედ მსგავს ბრძოლაში იყვნენ ჩართული WhatsApp-ის კონკურენტები: ისინი მომხმარებლებს სთავაზობდნენ ერთსა და იმავე არაეფექტურ გადაწყვეტას სხვადასხვა ფუნქციებით და ფასით; სანამ WhatsApp-ის გამოჩენამ ამ ბრძოლას წერტილი არ დაუსვა.

სტარტაპერის ვალდებულებაა შეუყვარდეს მომხმარებლის პრობლემა. თუ მომხმარებლის პრობლემას გულმოდგინედ ჩავუღრმავდებით, შევძლებთ ჩვენი გადაწყვეტით მომხმარებლებს სასურველი ქცევისკენ ვუბიძგოთ და შევქმნათ ახლებური, უფრო ეფექტური პროდუქტი.

წყარო: Antler Academy

თუ ამ საკითხით დაინტერესდი, დაელოდე ჩვენს მომავალ ბლოგპოსტს წაიკითხეთ ჩვენი ბლოგპოსტი: როგორ ამოვიცნოთ მომხმარებლის საჭიროება