“სტარტაპი საქმისთვის უნდა იზომებოდეს და არა უბრალოდ გასაზომად. არასდროს გაზომო მხოლოდ იმიტომ, რომ ეს შეგიძლია. გაზომე იმისთვის, რომ ისწავლო და აღმოფხვრა კონკრეტული პრობლემა.” – სტინ დებროვერი

წარმატებული კომპანიები უბრალოდ არ იქმნებიან, ისინი სწორი მენეჯმენტის, გადაწყვეტილების მიღების უნარისა და ადეკვატური შეფასებების შედეგად ვითარდებიან. იმისათვის, რომ სტარტაპმა მოულოდნელი კრახი არ განიცადოს და ყველა გასათვალისწინებელი გარემოება თვალყურის არეალში ჰქონდეს, აუცილებელია იცოდე ყველა იმ საზომის შესახებ, რომელსაც შეუძლია მნიშვნელოვანი ცვლილებებისა და განვითარების მოტანა.

მანამ უშუალოდ სტარტაპების საზომებზე გესაუბრები, აუცილებელია ჩამოყალიბებული გქონდეს შენი ბიზნეს მოდელი, რადგან გაგიმარტივდეს მისი ადეკვატურად გაზომვა სხვადასხვა პრობლემების თავიდან ასარიდებლად. თითოეულ ბიზნეს მოდელს ერთვის შესაბამისი საზომები, რომლებიც სტატიის მეორე ნაწილში ვრცლადაა განმარტებული.

რა არის შენი ბიზნეს მოდელი?

როდესაც სტარტაპზე მუშაობას იწყებ, მკაცრად უნდა გქონდეს ჩამოყალიბებული, რა არის შენი ბიზნეს მოდელი. ამ ყველაფრის გააზრებას და გაშალაშინებას დრო სჭირდება, თუმცა სამომავლო განვითარებისა და სტაბილურად პოზიტიური მდომარეობის შესანარჩუნებლად ეს დისციპლინა აუცილებელია.

ბაზრის მოდელი

საბაზრო მოდელი ერთ-ერთი ყველაზე გავრცელებულია ბიზნეს სამყაროში, რომლის აუდიტორიაც შედგება მყიდველებისა და გამყიდველებისგან. სტარტაპი ამ ორ სეგმენტს ერთმანეთთან დაკავშირებასა და საოპერაციო საკითხების მოგვარებაში ეხმარება, სანაცვლოდ კი კონკრეტული ოპერაციიდან იღებს პროცენტს, ან თავიდანვე აწესებს ფიქსირებულ გადასახადს.

ამ ბიზნეს მოდელის თვალსაჩინო წარმომადგენლებად რამდენიმე მსხვილი კომპანია გვევლინება: Ebay, AirBnB... ყველასათვის ცნობილმა კომპანიებმა სტარტაპობის პერიოდში მკაფიოდ განსაზღვრეს თავიანთი ბიზნეს მოდელი, გაზომეს სტარტაპი, დაუმატეს თავდაუზოგავი შრომა და მიიღეს ის შედეგი, რომლითაც ახლა მთელი მსოფლიო ბედნიერია.

რელევანტური სტარტაპ საზომები:

• ზრდის გაერთიანებული ყოველთვიური ტემპი (CMGR)

• მომხმარებელთა მოზიდვის ღირებულება (CAC)

• მთლიანი საქონლის ღირებულება (GMV)

• შენარჩუნების მაჩვნებელი (მომხმარებელი)

ელექტრონული კომერციის მოდელი

ადამიანები უფრო და უფრო დიდი კომფორტის ზონაში გადავდივართ, ამაში კი ტექნოლოგიური განვითარება გვიწყობს ხელს. უკვე შეგვიძლია სახლიდან გაუსვლელად, ონლაინ მაღაზიების მეშვეობით, შევიძინოთ ის, რისთვისაც სტანდარტული შოპინგისას დრო დაგვეკარგებოდა.

ელექტრონული კომერცია გულისხმობს ნივთების ონლაინ არხებით გაყიდვას. ეს ბიზნეს მოდელი მოდელი ძირითადად მხოლოდ მომხმარებელზეა გათვლილი (B2C), თუმცა სავსებით შესაძლებელია კომპანიებთან თანამშრომლობაც (B2B). ამ დროს სტარტაპები ან აწარმოებენ პროდუქტს, ან მწარმოებელი კომპანიებისგან გადაყიდიან.

ამ მიმართულებაში მსოფლიო ლიდერების გარდა (Amazon, Alibaba), საქართველოშიც არანაკლებ კონკურენტული ბიზნეს გარემო გვაქვს. (Extra, Vendoo). მათი კონკრეტული ორიენტირი საქართველოს ბაზარია, თუმცა ყველაფერი მცირედით იწყება.

რელევანტური სტარტაპ საზომები:

• ზრდის მარჟა

• მომხმარებელთა მოზიდვის ღირებულება (CAC)

• ზრდის გაერთიანებული ყოველთვიური ტემპი (CMGR)

სამეწარმეო მოდელი

ამ მოდელის სტარტაპებს მრჩევლისა და დამხმარეს როლი აქვთ შეთავსებული. ისინი დამკვეთებს გონივრული და მომგებიანი გადაწყვეტილებების მიღებაში ეხმარებიან. ამ მიდგომამ თითქმის ყველა ინდუსტრია მოიცვა, თუმცა, მსუყე ნაწილს სარეკლამო და პროგრამული უზრუნველყოფის მომსახურე კომპანიები წარმოადგენენ.

სამეწარმეო მოდელით ოპერირებისას კომპანია მაქსიმალურად ცდილობს დამკვეთს დაუახლოვდეს და შეძლოს გრძელვადიანი პარტნიორობის დამყარება. განვითარების საწყის ეტაპზე, მცირებიუჯეტიანი და მოკლევადიანი კონტრაქტები ნორმალური მოვლენაა, თუმცა, მიზანი აუცილებლად დიდხნიანი მეგობრობაა.

რელევანტური სტარტაპ საზომები:

• ჯავშანი

• Churn Rate (მომხმარებელთა რაოდენობის შემცირების მაჩვენებელი)

• განმეორებითი შემოსავალი (ARR)

Saas მოდელი

პროგრამული უზრუნველყოფა, როგორც სერვისი (Saas) დღევანდელ ბიზნეს და სამომხმარებლო სამყაროში საკმაოდ დიდი დატვირთვით გამოიყენება. ამ მოდელში ღრუბლოვანი პროვაიდერი (Cloud Provider) ინტერნეტის საშუალებით აწვდის მომხმარებლებს სასურველ პროგრამებზე წვდომას. პროგრამული უზრუნველყოფის დამოუკიდებელ გამყიდველს (ISV) შეუძლია კონტრაქტი დადოს მესამე მხარის ღრუბლოვან პროვაიდერთან, რომელიც მასპინძლობს პროგრამას. დიდ კომპანიებთან ღრუბლოვანი პროვაიდერი შეიძლება იყოს პროგრამული უზრუნველყოფის გამყიდველიც. SaaS პროდუქტები ხშირად იყიდება როგორც B2B, ასევე B2C მომხმარებლებისთვის.

რელევანტური სტარტაპ საზომები:

• მომხმარებელთა მოზიდვის ღირებულება (CAC)

• Churn Rate (მომხმარებელთა რაოდენობის შემცირების მაჩვენებელი)

• განმეორებითი შემოსავალი (MRR)

სააბონენტო (გამოწერაზე დაფუძნებული) მოდელი

სააბონენტო მოდელის სპეციფიკა მდგომარეობს იმაში, რომ სტარტაპი თავის მომხმარებელს ყოველთვიური ან ყოველწლიური სამომხმარებლო პაკეტის მეშვეობით ფიქსირებულ თანხას აჭრის. კომპანიას ამ დროს ნდობის ფაქტორი უმაღლეს პრიორიტეტად აქვს ქცეული, რადგან გრძელ ვადაში შეინარჩუნოს მომხმარებელი. ეს ყველაზე გავრცელებული ბიზნეს მოდელია და მისი ნათელი მაგალითებია ნეტფლიქსი, Spotify და სხვა.

რელევანტური სტარტაპ საზომები:

• ზრდის ყოველთვიური ჯამური მაჩვენებელი (CMGR)

• მომხმარებელთა მოზიდვის ღირებულება (CAC)

• განმეორებითი შემოსავალი (MRR)

• Churn Rate (მომხმარებელთა რაოდენობის შემცირების მაჩვენებელი)

საგადასახადო მოდელი

საგადასახადო მოდელის მქონე კომპანიები სხვადასხვა ტიპის გადახდების დამუშავებასა და წარმატებით განხორციელებაზე არიან პასუხისმგებელნი. ამ გადაწყვეტილებას, ძირითადად, ფინტეკ სტარტაპები იღებენ და სტანდარტული საგადასახადო პროცესების გამარტივების გარდა, კიბერთაღლითობის შანსებს მინიმუმამდე ამცირებენ. ეს კი მომხმარებლისთვის უმნიშვნელოვანესია. კომპანია შემოსავალს თითო წარმატებული ტრანზაქციიდან იღებს პროცენტის სახით. შესაბამისად, მოგების გასაზრდელად პრიორიტეტულია გადახდების სიმრავლე.

რელევანტური სტარტაპ საზომები:

• გადახდის საერთო მოცულობა (TPV)

• მომხმარებელთა მოზიდვის ღირებულება (CAC)

• შენარჩუნების მაჩვნებელი (მომხმარებელი)

სარეკლამო მოდელი

სარეკლამო ბიზნეს მოდელის მქონე სტარტაპები ქმნიან უფასო ციფრულ მედიას, სადაც მომხარებელს აქვს შესაძლებლობა შეარჩიოს სასურველი სამიზნე აუდიტორია და აწარმოოს სარეკლამო კამპანია. სასურველი შედეგის მისაღწევად კომპანიამ ყველა სტატისტიკური მონაცემი სისწორეში უნდა მოიყვანოს და მომხმარებელს მისცეს საშუალება გააკეთოს მაქსიმალურად სწორი პროგნოზები. სარეკლამო მოდელის მქონე ბიზნესების ძირითადი შემოსავლის წყაროს რეკლამები წარმოადგენს.

რელევანტური სტარტაპ საზომები:

• აქტიური მომხმარებლები

• მომხმარებელთა შეძენის ღირებულება (CAC)

• ზრდის მარჟა

• ზრდის გართიანებული ყოველთვიური ტემპი (CMGR)

გამოყენებაზე დაფუძნებული მოდელი

თავად ბიზნეს მოდელის დასახელებიდან გამომდინარე, მარტივად მისახვედრია მისი შინაარსი. ბაზარზე ამ მოდელით გასვლისას, მომხმარებელი იმის მიხედვით იხდის თანხას, თუ რა პერიოდითა თუ ინტენსივობით გამოიყენებს სტარტაპის მიერ შეთავაზებულ სერვისს. ამ ფასებს თავად კომპანია აწესებს.

რელევანტური სტარტაპ საზომები:

• ზრდის გართიანებული ყოველთვიური ტემპი (CMGR)

• ზრდის მარჟა

• შენარჩუნების მაჩვნებელი (მომხმარებელი)

აპარატურის მოდელი

ელექტრონული კომერციის მსგავსად, აპარატურის მოდელიც ორიენტირებულია მომხმარებლისთის კონკრეტული ნივთის ან ნივთების მიყიდვაზე. თუმცა, ერთი შეხედვით ეს მოდელი ცალსახად ერთჯერადი ჩანს. ანუ, როდესაც პროდუქტი გაიყიდება, მანდ მთავრდება კონკრეტულ მომხმარებელთან კონკრეტულ ნივთზე საუბარი. რამდენიმე კომპანიამ ხერხი ამჯობინა ღონეს და ფუნქციონალები დაამატა კონკრეტულ პროდუქციას, რათა თითო მომხმარებელმა რამდენჯერმე იყიდოს პროდუქცია მეტი ეფექტიანობისთვის.

რელევანტური სტარტაპ საზომები:

ზრდის გართიანებული ყოველთვიური ტემპი (CMGR)

მომხმარებელთა შეძენის ღირებულება (CAC)

ზრდის მარჟა

სტარტაპის საზომები

ასე თუ ისე, ზოგად ჭრილში მიმოვიხილეთ ბიზნეს მოდელები. ახლა, მოდი, სტარტაპის საზომებზე გადავიდეთ და ისინი შესაბამის ბიზნეს მოდელს შევუსაბამოთ.

1. აქტიური მომხმარებლები

აქტიური მომხმარებლები არიან ადამიანები, რომლებიც ურთიერთობენ თქვენს პროდუქტთან, ვებსაიტთან ან პროგრამასთან მოცემულ ვადებში. ბიზნესი, როგორც წესი, თვალყურს ადევნებს ყოველდღიური (DAU) და ყოველთვიური (MAU) აქტიური მომხმარებლების რაოდენობას.

ცალსახად იმის თქმა, თუ რამდენი მომხმარებელი ყავს სტარტაპს, რთულია. შეიძლება საიტს ყავდეს 10 000 რეგისტრირებული მომხმარებელი, თუმცა რეალურად 100 იყენებდეს მას (სიტყვა “აქტიური” სწორედ ამ ფაქტს უკავშირდება). რიცხვების დასაზუსტებლად აუცილებელია სპეციფიკური გამოთვლითი ოპერაციები, რომლებიც სწორედ იმიტომ შეიქმნა, რომ სტარტაპებს გაუადვილდეთ ობიექტური დასკვნების გაკეთება.

როგორ გამოვთვალოთ აქტიურ მომხმარებელთა რაოდენობა?

სანამ გამოთვლაზე გადახვიდოდე, სჯობს კარგად გაიაზრო, ვინ არის შენთვის აქტიური მომხმარებელი. ადამიანი, რომელიც ყოველდღე სტუმრობს შენს ბიზნესს? თუ კვირაში რამდენჯერმე? შეიძლება კონკრეტული ქმედებითაც განსაზღვრო. მაგალითად, მინიმუმ ხუთი წუთის განმავლობაში ჩერდება პლატფორმაზე. მაგალითად, ფეისბუკში აქტიურ მომხმარებლად ითვლება ის, ვინც საიტი ბოლო 30 დღის განმავლობაში გამოიყენა.

ამ ეტაპის ჩამოყალიბების შემდეგ უნდა დააკვირდე ცვლის დინამიკას, რაც დაგეხმარება სწორი გადაწყვეტილებების მიღებაში.

2. განმეორებითი შემოსავალი (ARR / MRR)

ამ ტიპის შემოსავლის გამოთვლის მოდელი დამწყები სტარტაპებისთვის ზედგამოჭრილია. წლიური განმეორებადი შემოსავლის (ARR) ან ყოველთვიური განმეორებითი შემოსავალის (MRR) მკაფიოდ განსაზღვრა სამომავლო გეგმების სწორად დამენეჯმენტებაში დაგეხმარება.

როგორ გამოვთვალოთ?

ყოველწლიური განმეორებითი შემოსავლის (ARR) გამოსათვლელად უნდა დაითვალო მხოლოდ წლიური ფიქსირებული შემოსავლები და არა – ერთჯერადი გაყიდვები.

ფორმულა სწორხაზოვანია – ARR (t) = Σ წლიური განმეორებადი შემოსავალი (t).

Saas ბიზნეს მოდელის მქონე სტარტაპები მხოლოდ ARR-ს იყენებენ. სააბონენტო მიმართულებას კი MRR-ის გამოყენებაც შეუძლიათ. ფორმულა იგივე პრინციპს ინარჩუნებს – MRR (t) = Σ ყოველთვიური განმეორებითი შემოსავალი (t).

3. ჯავშანი

დაჯავშნა სპეციფიკური სტარტაპის საზომია. ამ დროს მომხმარებელი იღებს ვალდებულებას, რომ თანხა სტარტაპთან დახარჯოს იქამდე, სანამ კონკრეტულ სერვისს მიიღებს. თუმცა, მიღებული თანხა შემოსავლად მაშინ ჩაითვლება, როდესაც მომხმარებელი ხელშეკრულებით გათვალისწინებულ სერვისს მიიღებს. ეს საზომი სტარტაპს შესაძლებლობას აძლევს, ობიექტურად შეაფასოს ბიზნესის განვითარების ტემპი. თუ ჯავშნის სიხშირე მაღალია, ხოლო შემოსავალი – დაბალი, ეს მიწოდებასთან ან განხორციელებასთან დაკავშირებულ პრობლემებზე მიანიშნებს.

როგორ გამოვთვალოთ?

გამოთვლა მოიცავს სააბონენტო და განმეორებითი შემოსავლების ან არასააბონენტო (ანუ ერთჯერადი) შემოსავლისა და მომსახურების საფასურის ჯამს. გასათვალისწინებელია მხოლოდ წლიური კონტრაქტის ღირებულება ნებისმიერი მრავალწლიანი კონტრაქტისთვის.

4. Burn Rate

Burn Rate არის სტარტაპის მიერ რეზერვირებული თანხის გამოყენების მაჩვენებელი. ეს მდგომარეობა განვითარებისთვის აუცილებლად გასათვალისწინებელია, რადგან სწორ მონიტორინგზეა დამოკიდებული, თუ რამდენი ხანი დარჩება სტარტაპს, სანამ მისი ფულადი რეზერვები სრულად ამოიწურება.

როგორ გამოვთვალოთ?

Burn Rate-ის გამოთვლა ორნაირად შეიძლება: ნაღდი თანხის შედარებით კონკრეტულ პერიოდში ან მთლიანი ფულადი სახსრების შედარება დროის გარკვეულ მონაკვეთში. სტანდარტულად Burn Rate-ი ყოველთვიურად გამოითვლება, თუმცა, თუ სტარტაპის გარემოებები უფრო ხშირ დათვლას საჭიროებს, არც ესაა პრობლემა.

5. Churn Rate (მომხმარებელი)

Customer Churn-ი უმნიშნვნელოვანესი საზომი ერთეულია სტარტაპ სამყაროში. იგი, ძირითადად, მიმართულია ისეთი ბიზნესებისკენ, რომელთაც აქვთ B2C ბიზნეს მოდელი, თუმცა შეიძლება მოიცვას B2B ბიზნეს მოდელიც. სტარტაპს ამ ინფორმაციის მონიტორინგი აძლევს საშუალებას, რომ საშიშროებები წინასწარ შეაფასოს და შესაბამისი გადაწყვეტილებები მიიღოს.

როგორ გამოვთვალოთ?

Churn Rate-ი შეიძლება გამოითვალოს ყოველთვიურად, კვარტალურად ან წლიურად. უშუალოდ გამოთვლის სისტემა ძალიან მარტივია. უბრალოდ უნდა ნახოთ მომხმარებელთა პროცენტული რაოდენობა კონკრეტული პერიოდის განმავლობაში და შეაფასოთ დინამიკა.

6. Churn Rate (შემოსავალი)

Churn Rate შემოსავლის კონტექსტში ნიშნავს შემოსავლის შემცირების მაჩვენებელს. ამით სტარტაპისთვის გასაგები ხდება დაკარგული მომხმარებლების შემცირების შედეგად მიღებული ფინანსური ზარალი. გასათვალისწინებელია, რომ მომხმარებლებისა და შემოსავლების დამოკიდებულება ყოველთვის პირდაპირპროპორციული არ იქნება.

როგორ გამოვთვალოთ?

სანამ გამოთვლაზე გადახვიდოდე, თავშივე უნდა გაიმიჯნოს მთლიანი და წმინდა შემოსავლების მაჩვენებლები. მთლიანი შემოსავლის დროს სტარტაპი მის რეალურ ზარალს აფასებს, ხოლო წმინდა შემოსავლები აერთიანებს შემოსავლების დაკარგვით გამოწვეულ სხვა დანაკარგებსა და დამატებით დეტალებს.

7. ზრდის გაერთიანებული ყოველთვიური ტემპი (CMGR)

CMGR ის გამოთვლის პერიოდი ძირითადად 6-დან 24 თვემდე პერიოდში ვრცელდება. ზრდის ზოგადი ცნება კონკრეტდება როგორც შემოსავლის, ასევე მომხმარებელთა მიმართებაში. მნიშვნელოვანია აღინიშნოს, რომ CMGR უზრუნველყოფს საშუალო ზრდას გარკვეული პერიოდის განმავლობაში, მიუხედავად იმისა, რომ ზრდის ტემპი შეიძლება განსხვავდებოდეს დროის გარკვეულ მონაკვეთებს შორის.

როგორ გამოვთვალოთ?

CMGR = [(ბოლო თვე / პირველი თვე) ^ 1 / (თვის სხვაობა თვეებში]] -1

8. მომხმარებელთა შეძენის ღირებულება (CAC)

CAC არის სტარტაპის მიერ გაღებული რესურსის მთლიანი ღირებულება, რაც ემსახურება მომხმარებლის მოპოვებას სხვადასხვა არხებით. ფასიანი CAC-ის დროს ახალი კლიენტების მოპოვება შესაძლებელია გარკვეული მარკეტინგული კამპანიის ფარგლებში, ხოლო შერეული CAC ნიშნავს ორგანულად მოპოვებულ მომხმარებლებს. თუ ამ სფეროს ექსპერტებს მივენდობით, ფასიანი CAC საკმაოდსასარგებლოა, რადგან ის უფრო მკაფიოდ აჩვენებს სტარტაპის შესაძლებლობების დინამიკას მომხმარებელთა შეძენის მიმართულებით.

როგორ გამოვთვალოთ?

გამოსათვლელად გასათვალისწინებელია ყველა ის მდგომარეობა, რაც საჭიროა თითო მომხმარებლის მისაღებად. ეს შეიძლება იყოს მარკეტინგული კამპანია, ადამიანური რესურსი. სტარტაპებისთვის მნიშვნელოვანია, რომ დროთა განმავლობაში შეამცირონ CAC, რადგან გავიდნენ მოხვეჭის ორგანულ ტიპზე. ასე შეიქმნება მეტად ჯანსაღი და მყისიერი გარემო.

9. მთლიანი მარჟა

მთლიანი მარჟა არის შემოსავალი, რომელიც დარჩა გაყიდული საქონლის ღირებულების გამოკლების შემდეგ, შემოსავლის პროცენტულობის გათვალისწინებით. ამან შეიძლება განსაზღვროს, შეუძლია თუ არა სტარტაპს გააგრძელოს მოგების გამომუშავება მისი შემოსავლების მიუხედავად. მომხმარებლებისა და შემოსავლის ზრდასთან ერთად მთლიანი მარჟაც გაიზრდება.

როგორ გამოვთვალოთ?

სტარტაპს შეუძლია ეფექტურად გამოიმუშაოს მნიშვნელოვანი შემოსავალი იმ ღირებულებით, რაც მიიღება გაყიდულ საქონელზე. გამოსათვლელად შეგიძლია გამოიყენო ფორმულა:

მთლიანი ზღვარი (%) = (შემოსავალი - გაყიდული საქონლის ღირებულება) / შემოსავალი.

10. მთლიანი საქონლის ღირებულება (GMV)

GMV არის გაყიდვების შედეგად მიღებული საქონლის საერთო რაოდენობა გარკვეული პერიოდის განმავლობაში. მნიშვნელოვანია, რომ მთლიანი საქონლის ღირებულების გამოთვლა იძლვა წარმოდგენას ზრდის შესახებ, მაგრამ ამით ვერ გაიგებ სტარტაპი მომგებიანია თუ არა. GMV უნდა განვასხვავოთ "შემოსავლისგან", რომელიც მხოლოდ GMV- ს ნაწილს იკავებს.

როგორ გამოვთვალოთ?

ისარგებლე შემდეგი ფორმულით: GMV = (საქონლის გასაყიდი ფასი) x (გაყიდვების რაოდენობა გარკვეული პერიოდის განმავლობაში).

11. მომხმარებლის შენარჩუნების მაჩვენებელი (Retention Rate)

სტარტაპისთვის მნიშვნელოვანია, რომ მომხმარებლები შეინარჩუნოს. ამას ზოგი ინდივიდუალურად მორგებული ლოიალურობის პროგრამებით ცდილობს, ზოგიც – სხვადასხვა გზებით. უბრალოდ იმის ფიქრი, რომ რადგან ერთხელ ისარგებლა სტარტაპით, ანუ სულ მისი ერთგული იქნება – არასწორია! არც ახალი მომხმარებლებით ჩანაცვლებაა სახარბიელო გადაწყვეტილება.

როგორ გამოვთვალოთ?

შეიძლება გამოყენებულ იქნას შემდეგი ფორმულა: შენარჩუნების მაჩვენებელი = ((კლიენტების რაოდენობა პერიოდის ბოლოს) - (ახლადშეძენილი მომხმარებლების რაოდენობა)) / (კლიენტების რაოდენობა პერიოდის დასაწყისში)

12. გადახდის საერთო მოცულობა (TPV)

TPV არ არის შემოსავალი! ის წარმოიქმნება გარიგების საფასურიდან გამომდინარე. მისი გამოყენება ეხება გარიგებებსა და გადახდების მთლიან ღირებულებას,რომლებიც დამუშავებულია კონკრეტული გადახდის დამუშავების პლატფორმის საშუალებით.

როგორ გამოვთვალოთ?

მიუხედავად იმისა, რომ არ არსებობს დადგენილი მეთოდოლოგია TPV– ს გამოსათვლელად, რადგან ეს არის უბრალოდ დამუშავებული გადახდების ჯამი, სტარტაპები თავად ითვლიან გადახდის საერთო მოცულობას გარიგებებიდან გამომდინარე.

___

მედიალაბი აქსელერატორია, რომელიც ეხმარება სხვადასხვა ეტაპზე მყოფ სტარტაპებს, იდეიდან მდგრადი ბიზნესის შექმნამდე. ჩვენი მთავარი ფოკუსია ინოვაციური გადაწყვეტები მედიის, ტელეკომუნიკაციების, მეგა მონაცემების შეგროვებისა და დამუშავების, ხელოვნური ინტელექტის, გეიმინგის, ვირტუალური და დამატებითი რეალობისა და მათთან დაკავშირებული ინდუსტრიების მიმართულებით.

გაქვს სტარტაპი ან სტარტაპიდეა? დარეგისტრირდი შენთვის შესაფერის პროგრამაში და შემოუერთდი მედიალაბის აქსელერატორს!

გამოიწერე ჩვენი Facebook გვერდი და არ გამოტოვო სიახლეები აქტუალური სტარტაპებისა და კომუნიკაციების ინდუსტრიის შესახებ.