სოციალურ მედია მარკეტინგში 2 წელზე მეტია ვმოღვაწეობ და, ჩემი კარიერის დასაწყისში, მეც დავუშვი ამ სფეროში ერთ-ერთი უპატიებელი “ცოდვა”: ბუსტის (boost) ღილაკის გამოყენება. ეჰ, არადა, სტატიის დაწყებას შეგონებით ვაპირებდი:

“არ გამოიყენო ბუსტის ღილაკი, იმიტომ, რომ ..” და შემდეგ დაუსრულებელი მიზეზების სერია (რომლებიც სტარტაპებისთვის განსაკუთრებით გასათვალისწინებელია).

თუმცა, მერე დავფიქრდი: “მარიამ, ვის ატყუებ? ხომ გახსოვს, ქვა მხოლოდ იმან უნდა ისროლოს, ვინც უცოდველია”. ჰოდა, ჩემო მკითხველო, შენთან ვაღიარებ. 1-2-ჯერ მეც მოვიქეცი ასე, მარტივად გავაკეთე რეკლამა და შედეგით რომ ვერ მოვიხიბლე, მერე მივხვდი, რომ Ads Manager-ი უნდა მესწავლა.

ფეისბუკის სარეკლამო პლატფორმის მთავარი უპირატესობა ტესტირების შეუზღუდავი შესაძლებლობებია. სტარტაპებისთვის კი, ტესტირება განვითარების განუყოფელი ნაწილია. სწორედ ამიტომ, ამ სტატიაში მოგიყვები, როგორ მუშაობს ფეისბუკის სარეკლამო პლატფორმა და რა ხრიკები არსებობს მაქსიმალურად დეტალური ოპტიმიზაციისთვის.

სტატია რამდენიმე პარაგრაფს მოიცავს, ამიტომ, თუ რომელიმე თემა შენთვის კარგად ნაცნობია, სხვა ნაწილი წაიკითხე:

• რატომ უნდა დაივიწყო ბუსტის ღილაკი

• ფეისბუკის სარეკლამო პლატფორმის ინსტრუმენტები

• Custom Audience თუ Lookalike Audience?

• რჩევები რეკლამის შედეგების გასაუმჯობესებლად

• სად ვისწავლოთ ფეისბუკის სარეკლამო პლატფორმა?

რატომ უნდა დაივიწყო ბუსტის ღილაკი?

ბუსტის ღილაკი დამწყები მარკეტერების მახეა, რადგან რეკლამის გაშვებას ამარტივებს. თუმცა, მასში შეზღუდულია: (არა რა, მაინც უნდა ჩამოვთვალო მიზეზები, მაპატიე!)

• მიზნები – მხოლოდ ორი ვარიანტი გაქვს: ჩართულობა ან მომხმარებლების ვებ-გვერდზე გადაყვანა.

• პარამეტრები – რეკლამას ვერ გაუშვებ მესენჯერში, სთორიში ან სხვა განთავსების არეალებში.

• კრეატივი – ვერ შეძლებ ტესტირებას და რამდენიმე ვიზუალის ან ტექსტის ერთმანეთთან შედარებას (იგივე A/B ტესტირებას).

სია დაუსრულებელია და აქ გავჩერდები.

ფეისბუკის სარეკლამო პლატფორმის ინსტრუმენტები

სანამ რეკლამის შექმნას დაიწყებ, კარგად დაფიქრდი, რა მიზანი გაქვს. ეს ის ნიუანსია, რომელიც მთლიანად განსაზღვრავს შენი კამპანიის შედეგს. ვეცდები, ლაკონურად და გასაგებად აგიხსნა, რა არჩევანს გთავაზობს ფეისბუკის სარეკლამო პლატფორმა და როგორ შეგიძლია თითოეული მიზნის (objective) გამოყენება.

რეკლამირების სტრუქტურა 3 ნაწილად იყოფა: კამპანია (Campaign), რეკლამის ნაკრები (Ad Set) და რეკლამა (Ad). კამპანიის დონეზე განსაზღვრავ მიზანს, რისი მიღწევაც გსურს: ჩართულობა, მომხმარებლების ვებ-გვერდზე გადაყვანა, ცნობადობის გაზრდა, აპლიკაციის გადმოწერა თუ სხვა. რეკლამის ნაკრების ნაწილში მიუთითებ ბიუჯეტს, დროის პერიოდს, აუდიტორიას, განთავსების არეალებს და ა.შ. რეკლამის ბოლო დონე კი მოიცავს სარეკლამო ვიზუალის, ტექსტის და ფორმატის არჩევას.

კამპანიის მიზნები 3 კატეგორიად იყოფა და თითოეული მათგანის ქვეშ რამდენიმე მიზანია გაერთიანებული:

ცნობადობის ამაღლება (Awareness)

Brand awareness-ის მიზანი ბრენდის ცნობადობის გაზრდაა. ფეისბუკის ჭკვიანი ალგორითმი სამიზნე აუდიტორიას რეკლამას მაშინ უჩვენებს, როდესაც ყველაზე მეტად მიაქცევენ ყურადღებას და დაიმახსოვრებენ. ამ ამოცანის არჩევის შემთხვევაში გირჩევ, რომ პროდუქტის/სერვისის შესახებ გაყიდვადი პოსტი არ დაწერო. უმჯობესია, ზოგადად მოყვე შენი კომპანიის საქმიანობის შესახებ და ვიზუალურ ნაწილში ლოგო გამოიყენო.

Reach-ის მიზანი არის ის, რომ კონკრეტული პოსტი, რაც შეიძლება ბევრი ადამიანის სიახლეების ველში გამოჩნდეს. თუმცა, ეს აპრიორი არ ნიშნავს, რომ მათ რეკლამა ნახეს. შეიძლება, უბრალოდ ჩასქროლეს, ვინ იცის? მიუხედავად ამისა, Reach-ი ჩემი ერთ-ერთი ფავორიტი ამოცანაა, რადგან დიდი აუდიტორიის დაფარვა ძალიან დაბალ ფასად შეგიძლია.

განხილვა (Consideration)

Traffic-ს მარკეტერები ვებ-გვერდზე მომხმარებლების გადასაყვანად იყენებენ, მიზეზი კი რამდენიმეა: მეტი ინფორმაციის მიწოდება, ონლაინ გაყიდვები, მონაცემების შეგროვება და ა.შ. თუმცა, შეგიძლია აუდიტორია აპლიკაციაში, WhatsApp-ში ან Messenger-შიც გადაიყვანო. არჩევანი შენზეა.

Engagement-ი იდეალურია იმ შემთხვევაში, თუ შენთვის ჩართულობაა მნიშვნელოვანი – კომენტარები, მოწონებები, გაზიარებები, ლინკის ან პოსტის გახსნა. თუმცა, ეს მიზანი გამოგადგება მაშინაც, როდესაც გვერდის გამომწერების გაზრდა ან კონკრეტული ღონისძიების გაპიარება გსურს.

App Installs-ის მიზანი ორიენტირებულია აპლიკაციის გადმოწერებზე. გირჩევ, აუდიტორიას კარგად აუხსნა, რატომ უნდა დააყენონ შენი აპლიკაცია და რა სარგებელს მიიღებენ ამით.

Video Views-ი მაშინ გამოიყენე, როდესაც ვიდეოზე მხოლოდ ნახვების დაგროვება გინდა. თუმცა, აქვე იმასაც გეტყვი, რომ იგივე კამპანია ჩართულობიდანაც (Engagement) შეგიძლია გაუშვა.

Lead Generation-ის მიზანი მონაცემების შეგროვებაა: სახელი და გვარი, მობილურის ნომერი, ელ-ფოსტა და ა.შ. თუმცა, ეს არც ისე მარტივია. მომხმარებლებს ისეთი რამ უნდა შესთავაზო, რომ პირადი ინფორმაციის გადმოცემა მოუნდეთ. მაგალითად: “შეავსე ეს ფორმა და მიიღე 50% ფასდაკლება პროდუქტზე/სერვისზე” ან “დაგვიტოვე შენი ელ-ფოსტა და მიიღე უფასო წიგნი X თემაზე”. უამრავი რამ შეგიძლია მოიფიქრო, მაგრამ იცოდე, რომ თითოეული შედეგი ძვირი დაგიჯდება.

Messages-ი იმ შემთხვევაში აირჩიე, თუ შენს გვერდზე რაც შეიძლება მეტი შეტყობინების მიღება გინდა. ზოგადად, კონკრეტული პოსტით ძალიან რთულია ისე დაარწმუნო მომხმარებელი, რომ მაშინვე იყიდოს პროდუქტი ან სერვისი. უმეტეს შემთხვევაში, მაინც სჭირდებათ ხოლმე დამატებითი ახსნა-განმარტებები. ეს ინსტრუმენტი კი ამაში გამოგადგება. თუმცა, გირჩევ, ხარისხიანად გამოიყენო. მთლად ისეც ნუ მოიქცევი, პოსტში ფასს რომ არ წერენ, აუდიტორიას “პირადში მოგვწერეთი” პასუხობენ და ამით ცდილობენ ჩართულობის გაზრდას. ასეთი ხრიკები უკვე მოძველდა და, მე თუ მკითხავ, ცოტა გამაღიზიანებელიცაა.

კონვერსია (Conversion)

Conversions-ის მიზანია პოსტის მნახველი შენს მომხმარებლად აქციო, ანუ გაყიდო პროდუქტი ვებ-გვერდზე, დაარეგისტრირო კურსზე, ღონისძიებაზე და ა.შ. ამ ამოცანის გამოყენება იმ შემთხვევაშია რელევანტური, თუ გამართული ვებ-გვერდი გაქვს და ფეისბუკ პიქსელსაც იყენებ – კოდს, რომლის საიტზე ინტეგრაცია და მომხმარებლების ქმედებების მონიტორინგი შეგიძლია. ამ შემთხვევაში, ფეისბუკის სარეკლამო მენეჯერს ზუსტად უნდა განუსაზღვრო შესაბამისი კონვერსიის ივენთი (Conversion Event) – გაყიდვა (Purchase), რეგისტრაციის დასრულება (Complete registration), გადახდის ინფორმაციის დამატება (Add payment info) და ა.შ.

სისტემა ასე მუშაობს: ყოველთვის, როცა კონკრეტული ადამიანი რომელიმე კონვერსიას ახორციელებს შენს ვებ-გვერდზე, ფეისბუკი მის მონაცემებს ინახავს. შემდეგ კი, შეგიძლია მის მსგავს აუდიტორიას აჩვენო რეკლამა.ამას Lookalike Audience-ის ფუნქციის დახმარებით შეძლებ, რასაც მომდევნო პარაგრაფში განვიხილავ. მანამდე კი, პასუხს გაგცემ კითხვაზე: რომელი კონვერსიის ივენთი უნდა ავირჩიო? ამისათვის, გაყიდვის ძაბრის მარტივ მაგალითს მოგიყვან:

1. ადამიანმა ნახა შენი კონტენტი და დაინტერესდა;

2. დარეგისტრირდა მეილის ბაზაში, ანუ განახორციელა Lead-ის კონვერსიის ივენთი;

3. ამის შემდეგ, შენს მეილში არსებულ ლინკს დააჭირა, გადავიდა ვებ-გვერდზე და კონკრეტული ნივთი კალათში დაამატა (Add to cart კონვერსიის ივენთი);

4. შეიყვანა საბანკო მონაცემები (Initiate Checkout კონვერსიის ივენთი);

5. და ბოლოს, როგორც იქნა, შეიძინა პროდუქტი თუ სერვისი (Purchase კონვერსიის ივენთი).

შედეგად, მომხმარებელმა 4 სხვადასხვა კონვერსია განახორციელა. რეკლამის ჩაშვებისას შეიძლება იფიქრო: “რატომ უნდა დავარეკლამო Lead-ის კონვერსიის ივენთზე მაშინ, როდესაც მყიდველებზე შემიძლია?”. ლოგიკურია, თუმცა ყველაფერი ასე მარტივად არ არის.

ზოგადი ფორმულა ასეთია: კვირაში მინიმუმ 15-25 კონვერსიას მაინც უნდა იღებდე იმისთვის, რომ ფეისბუკმა კონკრეტული ივენთის ოპტიმიზაცია შეძლოს. იდეალურ შემთხვევაში, 50-100+. შესაბამისად, თუ ვებ-გვერდიდან კვირაში 15-25 გაყიდვას ვერ იღებ, Purchase-ზე დარეკლამებას არ გირჩევ. გამოსავალი ისაა, რომ ძაბრის ზედა ნაწილში აიხედო და სხვა ივენთი აირჩიო ან ბიუჯეტი გაზარდო. დაელოდე შედეგებს და შემდეგ შეცვალე სტრატეგია. აქვე გახსოვდეს, რეკლამა ზუსტი მეცნიერება არ არის და მნიშვნელოვანია, რომ მუდმივად აწარმოო ექსპერიმენტები ფეისბუკის A/B ტესტირების დახმარებით.

Catalog Sales-ი შეგიძლია იმ შემთხვევაში გამოიყენო, თუ ფეისბუკის შოპში არსებული პროდუქტების ან სხვა კატალოგის (მაგალითად, ონლაინ შოპის) დარეკლამება გსურს.

ამ გზით შეგიძლია მიწვდე ახალ აუდიტორიას ან ისეთ ადამიანებს, რომლებიც ვებ-გვერდზე ან აპლიკაციაზე გადავიდნენ – შეიძინეს პროდუქტი; ნახეს და კალათაში დაამატეს, მაგრამ არ უყიდიათ და ა.შ.

Store Traffic-ის მიზანი ლოკაციაზეა ორიენტირებული, ანუ რეკლამას იმ ადამიანებს ამოუგდებს, რომლებიც შენს ფილიალთან ახლოს იმყოფებიან ან ცხოვრობენ. ამ ინსტრუმენტს უარყოფითი ის აქვს, რომ ქსელს გარეთ აქტივობის მონიტორინგი რთულია. ყველასთვის ხელმისაწვდომი არც არის – ძირითადად ის კომპანიები იყენებენ, რომლებსაც რამდენიმე ობიექტი გააჩნიათ და მისამართები ფეისბუკის Store Locations-ის განყოფილებაში აქვთ მითითებული. მაღაზიაში იგულისხმება რესტორანიც, სალონიც და სავარჯიშო დარბაზიც. ფეისბუკი გვირჩევს, რომ თუ მხოლოდ 1 ლოკაციაზე გსურს სტუმრების რაოდენობის გაზრდა, Reach-ის მიზანი გამოიყენო, რადგან ამ შემთხვევაშიც შეგიძლია დისტანციის მითითება.

Custom Audience თუ Lookalike Audience?

Custom Audience არის ინსტრუმენტი, რომლის დახმარებით მომხმარებელთა სხვადასხვა ჯგუფს გარკვეული პარამეტრების მიხედვით შექმნი. მაგალითად, რეკლამას იმ ადამიანებზე გაუშვებ, რომლებმაც ვებ-გვერდი დაათვალიერეს და კონკრეტული დრო დახარჯეს, ან რომელიმე განყოფილება გახსნეს (თუნდაც სერვისების ან პროდუქტების ჩამონათვალი). გარდა ამისა, შეგიძლია ფეისბუკის გვერდის მონაცემებიც გამოიყენო, ანუ იმ აუდიტორიას მიწვდე, ვინც შეტყობინება გამოგიგზავნა, ჩართულობა გამოხატა, რომელიმე პოსტი შეინახა, ვიდეოებს უყურა და ა.შ. მეტიც, თუ მომხმარებლების მონაცემთა ბაზა გაქვს (სახელი, გვარი, ელ-ფოსტა, მობილურის ნომერი და ა.შ), უბრალოდ ატვირთე და ფეისბუკი თვითონ მოძებნის ამ ადამიანებს პლატფორმაზე.

მეორე და არანაკლებ საინტერესო ინსტრუმენტია Lookalike Audience-ი, რომელიც შესაძლებლობას გაძლევს, მოძებნო ყველაზე შედეგიანი მომხმარებლების ჯგუფის მსგავსი აუდიტორია. მათ ექნებათ შენი იდეალური აუდიტორიის (ვინც იყიდა პროდუქტი, ხშირად ათვალიერებდა ვებ-გვერდს ან ფეისბუკის გვერდს) მსგავსი დემოგრაფიული და ქცევითი მაჩვენებლები. ამ ხელსაწყოს დახმარებით, ვარაუდით ტარგეტირება აღარ მოგიწევს. Lookalike Audience-ი შეგიძლია შექმნა Custom Audience-ის, არსებულ მომხმარებელთა ბაზის, ან ფეისბუკის გვერდის მონაცემების მიხედვით.

რჩევები რეკლამის შედეგების გასაუმჯობესებლად

რეკლამის ეფექტიანად მუშაობას პრაქტიკა და ბევრი ტესტირება სჭირდება. ამ პროცესში დამოუკიდებლად მიაგნებ შენს პროდუქტზე/სერვისზე მორგებულ ხრიკებს. მიუხედავად ამისა, მაინც გაგიზიარებ რამდენიმე ზოგად რჩევას, რომლებიც აუცილებლად უნდა გაითვალისწინო:

გამოიყენე Dynamic Creative

რაც არ უნდა კარგი ქოფირაითერი ან გრაფიკული დიზაინერი იყო (ან გყავდეს), ყოველთვის იქნებიან ადამიანები, რომლებიც შენს რეკლამას, უბრალოდ, ჩასქროლავენ. სწორედ ამიტომ, Dynamic Creative-ის გამოყენებას გირჩევ. ეს არის ფეისბუკის სარეკლამო მენეჯერის ფუნქცია, რომლის დახმარებით რეკლამაში შეგიძლია ჩააშენო მაქსიმუმ 10 ფოტო/ვიდეო, 5 ტექსტი (სათაური, ძირითადი ქოფი, აღწერა) და 5 მოწოდების (Call-To-Action) ღილაკი. აღნიშნული ფუნქცია მხოლოდ ამ კამპანიებზეა ხელმისაწვდომი: Conversion, Traffic, Video Views, Reach, Brand Awareness და App Install. ჩაატარე ექსპერიმენტები და დააკვირდი, რომელი აუდიტორიისთვის როგორი პოსტები მუშაობს.

ბიუჯეტის ოპტიმიზაციისთვის გამოიყენე Bid Cap ან Cost Cap

თუ დიდი ბიუჯეტი არ გაქვს, მაშინ ოპტიმიზაციისთვის აუქციონის სტრატეგიების გამოყენებას გირჩევ. Cost Cap-ის დაყენებით შენ განსაზღვრავ 1 შედეგში დახარჯულ საშუალო თანხას, Bid Cap-ით კი – მაქსიმუმს. თეორიულად რომ არ აგიხსნა, პრაქტიკულ მაგალითს მოგიყვან:

დავუშვათ, შენი ბიუჯეტი 50 დოლარია და Cost Cap-ი აპლიკაციის გადმოწერაზე $10-ზე დააყენე. ფეისბუკი ამას გაითვალისწინებს, თუმცა ერთი მომხმარებლის მიერ ინსტალაცია შეიძლება $8 დაგიჯდეს, მეორეს მიერ კი – $12. ამ სცენარით, კამპანიის ბოლოს, შესაძლოა დახარჯო $48 და 6 შედეგი მიიღო, თითო – საშუალოდ 8 დოლარად (იხილე დიაგრამა).

იგივე მაგალითზე, თუ Bid Cap-ს დააყენებ, მაქსიმუმ 10 დოლარს დახარჯავ (და არა საშუალოდ, როგორც წინა შემთხვევაში). შესაბამისად, რეკლამის ბოლოს შენი ბიუჯეტიდან შესაძლოა $24 დოლარი ამოწურო და 4 რეზულტატი მიიღო, თითოეული – 6 დოლარად. (იხილე დიაგრამა)

სანამ ამ სტრატეგიებს აირჩევ, სჯობს, ზოგადად ჩაუშვა კამპანიები, დააკვირდე, დაახლოებით რა გიჯდება 1 შედეგი (Cost Per Result) და შემდეგ გამოიყენო კონკრეტული აუქციონი.

ამოწმე რეკლამის შედეგები

ზოგჯერ რეკლამა იმდენად მოსაბეზრებელი ხდება აუდიტორიისთვის, რომ ან ღიზიანდებიან, ან მალავენ კიდეც (Hide ფუნქციის გამოყენებით). ეს რომ თავიდან აირიდო, ანალიტიკაში თვალი ადევნე რეკლამის ჩვენების სიხშირეს (Frequency). ის გვიჩვენებს, საშუალოდ რამდენჯერ ნახა ერთი და იგივე პიროვნებამ შენი პოსტი. რაც უფრო დაბალია მაჩვენებელი, მით უკეთესი. ამის კონტროლი მხოლოდ Reach-ის ხელსაწყოში შეგიძლია – მისი დახმარებით, განსაზღვრავ, კონკრეტული დღეების განმავლობაში მაქსიმუმ რამდენჯერ უნდა ნახოს მომხმარებელმა რეკლამა. იდეალურ შემთხვევაში, ჩვენების სიხშირე 1-2 უნდა იყოს, მაქსიმუმ კი – 4. თუ უფრო მაღალი მონაცემი დაგიფიქსირდა, აუცილებლად შეცვალე ტექსტი და ვიზუალი.

რეკლამა სწორ ადგილას განათავსე

ფეისბუკი ავტომატური განთავსებების გამოყენებას გვირჩევს, რადგან თუ რეკლამას მხოლოდ სიახლეების ველში ჩაუშვებ, შეიძლება, კარგი შედეგი ვერ დადო. სწორედ ამიტომ, ტესტირების საწყის ეტაპზე, დააკვირდი, როგორ მუშაობს სხვადასხვა განთავსების არეალი – ფეისბუკი, ინსტაგრამი, სთორები, მესენჯერი, სტატიები, აპლიკაციები, ვებ-გვერდები და ა.შ. შედეგების მიხედვით, გაანალიზე, რომელია ყველაზე მაღალრეიტინგული შენს შემთხვევაში და შემდგომ კამპანიებში მხოლოდ ის გამოიყენე. (შეიძლება რამდენიმე იყოს ასეთი).

ასევე გაეცანი: 5 სოციალური ქსელი, რომლებიც ყველა სტარტაპმა უნდა გამოიყენოს.

სად ვისწავლოთ ფეისბუკის სარეკლამო პლატფორმა?

პირველ რიგში, დიდი მადლობა, რომ სტატია წაიკითხე და დასკვნით პარაგრაფში გადმოინაცვლე. ფეისბუკის სარეკლამო პლატფორმა იმდენად მრავალფეროვანი და დიდი თემაა, რომ თითოეული ფუნქციის დეტალურად განხილვას მთელი წიგნი შეიძლება დასჭირდეს. ოღონდ, ეს წიგნი, მაქსიმუმ, ნახევარ წელში მოძველდება და ახალი იქნება დასაწერი. მიზეზი მარტივია: ამ სფეროში მუდმივად იცვლება რაღაცები. ჰოდა, თუ კითხვები გაგიჩნდა და შენთვის მაინც ბუნდოვანია გარკვეული საკითხები, მინდა ფეისბუკის მიერ შექმნილი უფასო ონლაინ კურსები გირჩიო, რომელსაც Facebook Blueprint-ი ჰქვია და მსოფლიოში ანალოგი არ გააჩნია.

ეს კურსები შენთვის საინტერესო იქნება იმ შემთხვევაში, თუ სტარტაპი გაქვს, დაინტერესებული ხარ ამ ინდუსტრიით ან უბრალოდ ცოდნის გაღრმავება გინდა. გადადი ვებ-გვერდზე, აირჩიე სასურველი თემა, კურსის ხანგრძლივობა და სირთულე. სწავლის შემდეგ სხვადასხვა კატეგორიის სასერთიფიკატო გამოცდის ჩაბარებაც შეგიძლია. გისურვებ წარმატებას!

___

მედიალაბი აქსელერატორია, რომელიც ეხმარება სხვადასხვა ეტაპზე მყოფ სტარტაპებს, იდეიდან მდგრადი ბიზნესის შექმნამდე. ჩვენი მთავარი ფოკუსია ინოვაციური გადაწყვეტები მედიის, ტელეკომუნიკაციების, მეგა მონაცემების შეგროვებისა და დამუშავების, ხელოვნური ინტელექტის, გეიმინგის, ვირტუალური და დამატებითი რეალობისა და მათთან დაკავშირებული ინდუსტრიების მიმართულებით.

გაქვს სტარტაპი ან სტარტაპიდეა? დარეგისტრირდი შენთვის შესაფერის პროგრამაში და შემოუერთდი მედიალაბის აქსელერატორს!

გამოიწერე ჩვენი Facebook გვერდი და არ გამოტოვო სიახლეები აქტუალური სტარტაპებისა და კომუნიკაციების ინდუსტრიის შესახებ.